ALUP se Irfan Abid kii ek na_ii Ghazal

aadaab, dosto!

kuchh roz qabl :Jigar: kii Ghazal :tabeeat in dinoN ... : paRh rahaa
thaa. is dilpazeer Ghazal ne hameshaa mahzuuz kiyaa hai. lekin is
martabaa kuchh aisaa asar huaa ki is zameen meN tabaa.aazmaaii kii
Khvaahish jaag uThii. merii haqeer koshish ke nateeje meN jo Ghazal
huii vo aap kii Khidmat meN pesh hai. nigaah-e-karam farmaaiye aur
apnii raae se navaaziye.

Ghazal

daleel-e-dard aur aaiina-e-Gham hotii jatii hai
zameen-e-chashm terii yaad meN nam hotii jaatii hai

ajab kyaa, mujh ko jyoN jyoN aadat-e-Gham hotii jaatii hai
jahaaN kii har masarrat merii hamdam hotii jaatii hai

idhar jeene kii Khvaahish hai jo baRhtii jaatii hai har dam
udhar umr-e-ravaaN jo har ghaRii kam hotii jaatii hai

na jaane naa.samajh ne mudda.aa kyaa pesh kar Daalaa
jo qismat is dil-e-miskeeN pe barham hotii jaatii hai

tumhaare dast-e-naazuk meN sajii shamsheer ke sadqe
mirii gardan tumhaare saamne Kham hotii jaatii hai

iraade kyaa haiN us ke, ye vahii jaane ki rab jaane
mire mahbuub kii har baat mub.ham hotii jaatii hai

fareb-e-aashiqii kahiye ki nazroN kii Khataa kahiye
ki har tasveer ab tasveer-e-jaanam hotii jaatii hai

muhabbat paak jazbaa hai to raah-e-aashiqii mujh par
na honaa chaahiye dushvaar, taaham hotii jaatii hai

zamaane bhar meN ham badnaam hote haiN agar to kyaa
muhabbat is tarah mash.huur-e-aalam hotii jaatii hai

asaas-e-zindagii kyaa ho ki naakaam-e-muhabbat kii
har ik ummeed bahr-e-yaas meN zam hotii jaatii hai

bahaaroN meN shaguftaa zaKhm, baarish meN ravaaN aaNsuu
fazaa-e-qalb kyoN paaband-e-mausam hotii jaatii hai?

Khudaa kaa shukr hai, jab jab bure haalaat aate haiN
mire eemaan kii bunyaad muhkam hotii jaatii hai

chale aao, sadaa-e-aaKhirii kaa kuchh bharam rakh lo
hamaarii saaNs raftaa raftaa maddham hotii jaatii hai

maiN ik mahmaan thaa, mujh ko to ik din lauTnaa hii thaa
ye dunyaa kyoN bhalaa masruuf-e-maatam hotii jaatii hai?

kahaaN tak quvvat-e-bardaasht degii saath :Abid: kaa
ye saarii zindagii ik soz-e-paiham hotii jaatii hai

niyaazmand,
Irfan :Abid:

About AUS

The Annual of Urdu Studies (AUS)
Editor: Muhammad Umar Memon
University of Wisconsin, Madison
Editorial Staff: Elizabeth Bell, Jane Shum
Technical Consultant: Faisel Saeed
The aim of the AUS is to provide scholars working on Urdu humanities in the broadest sense a forum in which to publish scholarly articles, translations, and views. The AUS will also publish reviews of books, an annual inventory of significant Western publications in the field, reports, research-in-progress, notices, and information on forthcoming events of interest to its readers (conferences, workshops, competitions, awards, etc.). Each issue of the AUS will also include a section in the Urdu script featuring old and new writing.

The AUS is indexed by Periodica Islamica, the Bibliography of Asian Studies Online and Zeller Verlag, and is available in most of the major university libraries in Europe and North America.

The Digital South Asia Library-Annual of Urdu Studies Annual of Urdu Studies

C.M. Naim, Editor
....................................
Annual of Urdu Studies is indexed in the Bibliography of Asian Studies.